دخلنا في الجد

فعلاً دخلنا في الجد ...افتح عيونك ..قمْ ..ريقك ناشف وإلا مش ناشف ؛ قوم و خلصنا ...لسا اليوم بأوله ..! اضافة اعلان


ماذا تسحرت ..؟ إيش أيش ..؟ جد والله ..؟؟ طيب روقْ و روقها ..! تسحرت وإلا ما تسحرت ..مش مشكلتي ..بدك تقوم يعني بدك تقوم ..الأمور مش على كيفك ولا على كيف إللي خلفوك ..!

الطلبات : ومش مكتوبات بورقة ..بدك تحفظهن ..أو لما تصير بالسوق أعطيني ( آلو ) ...يلا ..قوم تزحزح ..:

جاجتين كويسات بدون قهر ..كيلو رز مصري بدون تذمر ..باكيت شعيرية بدون مسبّات ..اثنين كيلو بطاطا بدون حقد ..ثلاثة كيلو بندورة بدون أفأفة ...اثنين كيلو خيار بدون قلعطة ..كيلو ليمون بدون امتعاض ..وقية بهارات وحوايج بدون زعل ..ما تنسى كيلو تمر بدون حرقطة .....!

لحظة لحظة ...دار أخوي برنّو ...أيوا ..وانتو بخير ..جد و الله ..؟ بتشرفوا ..!

انت لسا ما قمت ..قوم ...وكل الطلبات اللي طلبتها منك بتزيد عليها اثنين اثنين اثنين من كل نوع ...دار أخوي بدهم يفطروا عندنا ...بتجيب الطلبات وبدون ما تعمل حالك بدك تنجلط ...!

صحيح : ما تنسى تجيب ببسي حجم « عشائري « ..

ملاحظة : تحفظتُ على ذكر مين يحكي مع مين : يجوز زوجة مع زوجها ..ويجوز أم مع ابنها ..و يجوز أخ مع أخوه ..و يجوز و يجوز ...أما لماذا تحفظتُ على ذلك ؟؟ فقط حفاظاً على تماسك العائلة الأردنية في وجه الجيران ...هاهاها ..!