قَسَم رَقْصُقْراطْ

أبو مثقال: وينك زمان يا شخلوعة ..؟؟
الرّقّاصة: هيني فوق الأرض ..الدنيا توخذني شمال وتجيبني يميناضافة اعلان

أبو مثقال: صحيح ..بعدك بتشوفي الأرض مايلة ..؟؟
الرّقّاصة: عمري ما شُفتها مايلة ..بَسْ إنتو الحَوَل ضاربكوا ..!!
أبو مثقال: طيّب بتستمتعي وانتِ بتهزّي ..؟؟
الرّقّاصة: أكثر من استمتاعكوا
أبو مثقال: أبوك وإمّك وإخوانك ما إلهم موقف منّك ؟؟
الرّقّاصة: بالعكس ..كلهم بشجعوني ..وخايفين عليّ ..
أبو مثقال: خايفين عليك من إيش ؟؟
الرّقّاصة: خايفين أتراجع عن شَرَف المهنة ..وإحنا كلنا أقسمنا قَسم رَقْصُقْراطْ..!!
أبو مثقال:ليش أهلك شو بشتغلوا ..؟؟
الرّقّاصة: بابا ..الطبّال تاعي ..وماما عَ الكاش ..واخواني الشباب البودي قاردات بتوعي ..وخواتي الصبايا موزّعات عَ الكليبات إللي في الفضائيّات ..!!
أبو مثقال: يا عيني ..ويا حبيبي عَ الشّرَف إللي ينقِّط تنقيط ..وإن شا الله دار عمّك ودار خالك نفس الماركة ..؟؟
الرّقّاصة: لأ ..لأ ..دار عمّي إختصاص تذاكر ..ودار خالي بيجيبولنا أخبار الناس إللي بنافسونا ..!!
أبو مثقال: يا حبيبي ..أحسن ناس وأجدع ناس ..!!!
الرّقّاصة: وليش التخويت ..هو فيه شغل ماشي أحسن من هالشغلة ..أي بهزّة وحدة ..بهزّ جيوب ..وإذا شدّيتْ الهزّ ..بهزّ اقتصاد بحالو ..
أبو مثقال: وعاد بتعرفي تهزّي كويّس ..؟؟
الرّقّاصة: يا حبيب عمري يا أبو مثقال ..الرقص مش هالشغلة الصعبة عندنا ..الرقص قدّيش كميّة اللحم إللي بِرُطْ من الجسم بَسْ..!!
أبو مثقال: بَسْ هيك ...!!!!؟؟؟!!!
الرّقّاصة: طبعاً ..إذا عند الوحدة فينا لحم مْرَطْرِطْ ..بَسْ الوحدة تحرِّك حالها ..واللحم لحالو يروح ويجي..وهذا هو الرقص إللي ماشي
أبو مثقال: طيّب ممكن أقسم قَسَم رَقْصُقْراطْ وأصير واحد من الشِّلّة ..؟؟
الرّقّاصة: بَسْ إنت شكلك مُقرف ..وما بُصلح لأي شي
أبو مثقال: ولا شي ..ولا شي ؟؟
الرّقّاصة: ولا شي ..بَسْ ممكن ندفعلك إذا بتكتب عنّا إشي كويّس في الجرايد ..وتجيبلنا زباين ..
أبو مثقال: أيوه أيوه ..هاي آخرتها ..أركّب قرون ..!!
الرّقّاصة: ليش ما عملوها قبلك كثار ....وكلّو حالف قَسم رَقْصُقْراطْ....!!! وقُدّام عيني ما حدا قلّي ..!!