الأحد 29-05-2022
الوكيل الاخباري
Clicky

وين صِرْتْ يا زلمة..؟؟



اشتقتلك ..اشتقت لصورك ..اشتقت لَحَكْياتَكْ إللي بجنِّنوا ..!! قبل مدّة كنت مالئ الدنيا وشاغل الناس ..والآن ..أين أنت ..؟؟ بعدك تُفْطر ..؟؟ بعرف سؤالي غلط ..وكان لازم أسألك : بعدك تتناول ثلاث وجبات على الأقل في اليوم ..؟؟ بالنسبة إلنا إحنا نطمئنك عنّا ..فما زلنا نتناول وجبتين كما كنّا ..مع فارق بسيط عيب أحكيه ؛ بس مضطر ..الفرق ..بالكميّة ..عَ أيّامك كنّا نأكل وجبتين..الوجبة تعبّي ثلاث أرباع البطن ..أمّا الآن ..فالحمد لله ..الثلاثة أرباع موجودة ..ولكن ليس في البطن ..يعني بنوكل وجبتين ..بس كل وجبة رُبُع بطن ..!!اضافة اعلان


يا ترى بعدك زي ما إنت وإلاّ تغيّرت ..؟؟ طمّني عنّك ..وعن مشاريعك ؛ الله لا يهينك ..!! في إشي جاي في الطريق .. يا زَلَمَة تُهنا ..وذبحتنا القلّة ..

طيّب ..سيبك من هالحكي كلّه ..إنتَ راجع وإلاّ الغيبة طوّالة ..؟؟ بالله عليك ..أَحَلْفَكْ بالغالي على قليبك ..إذا راجع أعطينا ( دِمْ ) ..!! طيّب بلاش ..حواليك صورة ( طازة ) إلكْ ..ابعثلي إيّاها على الواتس اب ..يجوز ما بتصدقني وبتقول ( النصيرات ) يتخوّث ..والله بتفاءل فيك ..ليش مش عارف ..هيك من ربنا ..والمسألة هاي غير خاضعة لأي تفسير علمي أو أدبي أو تمريضي أو فندقي ...!!

عن جَدْ ومِشْ مزح ..وين صارت بِيْكْ ...؟؟!! مُرْ مُرْ خلينا نشوفك ..