الاستعداد الأخير للبحث عن الفساد

( لدّاد يقف في مكان عام مع أربعة شباب آخر موضة وآخر صرعة ..وعلى بُعد أمتار تقف أربع سيارات آخر نوع ..على لوحة السيارة الأولى حرف (ف) ..وعلى الثانية ( س ) وعلى الثالثة ( ا ) وعلى الأخيرة ( د ) ..)اضافة اعلان

لدّاد : انت أول واحد ..تروح عَ السيارة الأولى إللي عليها لوحة ( ف ) ..وقّف فوقها ..واسحب مسدسك ..وخلّك جاهز ..!!
الأوّل : أطُخْ وإلاّ لأ ..؟؟
لدّاد : طخّك عُزْرين ..أتطخ ع الفاضي هيك ..؟؟ بس خلّك جاهز وإيدك عَ الزناد ....أما انت حبيبي ثاني واحد تروح عَ السيارة الثانية أم لوحة ( س ) ..والثالث عَ السيارة أم لوحة ( ا ) ..والرابع ع السيارة أم لوحة ( د ) ..وكلكو تعمل نفس اللي شرحتو للأول ..بتطلعوا فوق السيارات وتسحبوا مسدساتكوا وتكونوا جاهزين ...مش تطخطخوا بعض ..؟؟
الجميع : يعيش لدّاد ..عدو الفساد ( ويتجهون إلى السيارات ويصعدون فوقها ..كل واحد حسب الخطّة )
لدّاد : يا الله شباب ..سمعوني نشيد الفساد
الجميع :
تحيا تحيا يا لدّادْ يا محارب كل الفسادْ
يا ساحب سيفك بالطول يا مّرْمِغْ وجه الحُسّادْ
يا ابن العزْ هات الرُّزْ
يا الله فِزْ وجِيْب الزّادْ
لدّاد : ممتاز ..هيك ..ولا رَحْ يقدر يمُرْ من هون ..
( يقترب أبو فالح من لدّاد )
أبو فالح : ويش إللي أنا شايفو يا لدّاد ..؟؟
لدّاد : زي ما إنتَ شايف ..جهزت الشباب عشان إذا مَرَق مقصوف العمر الفساد ..يقظوا عليه أو يمسكوه عَ الأقل ..
أبو فالح: وبالك رَح يمر من هون ..؟؟
لدّاد: طبعاً لأ ..ما رحْ يمر ..لأنو أصلاً موجود هون !!
أبو فالح:كيف ..كيف .. ما فهمت ..؟؟
لدّاد: لِدْ عَ السّيارات زين
أبو فالح:شايفهن ..مالْهِنْ ..؟؟
لدّاد: السيارات الأربعة ..كل سيارة نمرتها حرف ..لما تجمعهن مع بعض يصيرن كلمة ( فساد ) ..
أبو فالح: شو يعني ..مش فاهم ؟؟
لدّاد: يعني شباب معها مسدسات وإيدها عَ الزناد وتحت الشباب الفساد ..شو يعني يا ابو فالح ..يعني الشباب اللي بدها تحارب الفساد .....................والباقي عندك ...!!