لاعبوا الفيفا .. واللاعبون علينا

يوسف المومني


أستغرب كيف يقوم الاتحاد الدولي لكرة القدم وبعض الصحف التي تجري مسابقات أفضل اللاعبين كيف تختار لاعبيها ! أنا بقول ان هظول اللاعبين بدهم فت خبز كثير حتى يستحقوا يكونوا تحت الأضواء.

قال شو ؟! ميسي ورونالدو وفالكاو وغيرهم الكثير من الأسماء التي أعتبرها أنا شخصياً مبتدئة بفنون اللعب والمراوغة أمام الفريق الذي أُزكيه أنا , اللعب ياجماعة بده فنون واحتراف وحركات ,قال شو فريق أفضل لاعبي العالم ! وببلشوا يحطوا من هالأسماء التي لا تسمن في اللعب ولا تغني من جوع , فريقهم فاشل وضعيف وبعرفش يلعب وما بسرِّحهم بسخلتين ,أمَّا الفريق الحكومي الأردني فهو الفريق المحترف باللعب والمراوغة واللف والدوران وبدوخوا خصمهم الوحيد( الشعب ) تدويخ وما إلهم منافس.

فمن فنون اللعب والمراوغة على الصعيد الدولي مثلاً , موضوع اللعب مع مرسي ,فقد تم وعد مرسي بحل قضايا الوافدين المصريين وشؤون العمالة ,وبعد ما دار ظهره من هون قام الفريق الحكومي من هون باتخاذ قرار ضغط على العاملين بتصويب أوضاعهم خلال فترة زمنية قصيرة , يا ترى شو بدهم هالمرة من مرسي ؟! مش بحكيلكوا لعييييييييبة.

ومن فنونهم على الشعب لما بلشوا يلعبوا فينا بسولافة سحب سيارات مدراء الزراعة من تحت اسنانهم , وبعدين ولغاية الآن هاي السيارات مع مدرا الزراعة (بتختخت) كيف ما بدهم سواقينهم حتى, إذاً سولافة تخفيض النفقات وسحب السيارات أُمَّات النمر الحمر (لعبة).

لما قررت الحكومة رفع الأسعار قالوا إنه الصندوق الدولي أمرهم بذلك , صدقنا إحنا كالعادة ,بعد شوي سمعنا ان الصندوق يرحب بخطوة رفع الاسعار بالاردن وهذا دليل على انه البنك الدولي سمع بالموضوع بعد مارفعت الاردن وهاي لعبة لعبوها علينا الفريق الحكومي المحترف.

ولما بتناقش بعض أصحاب القرار بقولولك لازم نرفع اسعار؛ الشعب معاه سبعة مليون خط خلوي ! ول! يعني اذا اولاد الكبار اشتروا لصاحباتهم خلويات احنا ندفع ضريبة الفساد الاخلاقي يللي عندأولاد صانعي الفساد المالي ,وبعدين أي حركة رفاهية لازم تسرقوها من الناس ! حلوا عنا فريقكوا أصبح مكشوف اللعب.

لأ... والأدهى والأمر أن الحكومة الآن صارت تسوق لطبختها الحكومية القادمة وهي الانتخابات ,فقاموا بتنزيل سعر بنزين 90 قرشين لللتر , كثر الله خير قروشهم,طيب كيف نزلتوا الاسعار دون مشاورة الصندوق الدولي ؟! هذا دليل ان الاسعار خطة حكومية تلعبها لوحدها ومن رأسها وتلقي على الصندوق الدولي باللائمة عشان نهدأ احنا كفريق شعب اعتاد خسارة كل المباريات.


وآخر لعبة علينا هي لعبة تحويل بعض الاسماء مؤخرا لمكافحة الفساد عشان يروجوا إلنا سولافة الانتخابات وانه البلد في طريقها لتنظيف الفساد من أروقته وزواياه , وبعد ما تنتهي الانتخابات رح يطلعوا هظول عدم مسؤولية عن ما اقترفوه وبيطلع الفاسد (مجهول) وهذا رح يكون أقوى وأجمل وأحلى قوووووووووووووووووووووووووول بالشعب .


مش قلتلكوا فريقنا الحكومي فوق مستوى تصنيفات الفيفا وغير الفيفا كمان

يوسف المومني

[email protected]