مدير فرع شركة الكهرباء يتلفظ بألفاظ "شوارع"

الوكيل - وردنا من الأخ محمد مصطفى محمود بأنه راجع شركة الكهرباء فرع صويلح للتأكد من صحة ارتفاع فاتورة الكهرباء الشهرية على غير العادة , فبعد المعاناة بالبحث عن من يحل مشكلته التقى بمدير الفرع و وجه له كلام يخجل أصحاب السوابق أن يتلفظوا به و كان على هذه الحادثة ثلاثة موظفين سمعوا بأذنهم هذا الكلام و لكنهم 'بشروا' المواطن بأنهم لم يسمعوا شيئاً !

كان أحد هؤلاء الموظفين شيخ ملتحي فبعد نقاش بين المواطن و الشيخ قال له الشيخ : على موتي ما بشهد الا بالحق .

وقام المواطن بتزويدنا بجميع أرقام و أسماء المعنيين و هو جاهز للمواجهة و يضع هذه الشكوى على مكتب مدير شركة الكهرباء الأردنية .

بما يلي نص الرسالة التي وردتنا من الأخ محمد :

انا يا ابو هيثم حوالي قبل اربع اسابيع راجعت شركه الكهرباء بسبب مشكله وهي انه احنا فاتوره بيتنا بتتراوح ما بين 25_40 ومعي كشف بهذا الحكي والمشكله انه بتيجينا بشهر 2+3 كل شهر 87 دينار بناءا عليه راجعت الشركه. بالبدايه صرت اسأل بالمكاتب مين ممكن يحللي مشكلتي طبعا وكالمعتاد من مكتب لمكتب وعالفاضي فسألت عن المدير ودلوني غلى مكتبه فرحت عليه وشرحتله قصتي وما فادني وحولني على موظف عنده فسحبت حالي ورحت فحكالي الموظف ما بساعدك غير الشيخ اللي مكتبه بالزاويه عالشمال والله وبوجهي عليه فلقيت عنده المدير وموظف وموظفه فبلشت احكي للشيخ قصتي وهون بلشت مشكلتي الثانيه انه وانا بحكي مع الشيخ قاطعني المدير وحكالي انت ليش مو راضي تفهم فحكيتله انا بدي حل فحكالي ما في حل فحكيتله والعمل حكالي العمل انك تدفع الفواتير وبس فحكيتله هذا مو حل فحكالي انت مو راضي تفهم شو يعني ابوس (.....) علشان تفهم بصراحه انا حسيت حالي اسمعت غلط فحكيتله عفوا شو حكيت فعاد الحكي مره ثانيه . انا تلقائيا رديت عليه وحكيتله انا اخلاقي ما بتسمح اني ترد عليك واحنا ببلد فيها قانون وانا بوعدك اني راح اوصلها وراح احكي مع السيد محمد الوكيل فجاوبني روح اعمل اللي بدك اياه واحكي مع مين ما بدك انا طبعا تلقائيا حكيت للموظفين اللي كانوا موجودين اني راح اشتكي عليه بالنسبه للموظف حكالي روح اعمل اللي بدك اياه انا ما راح اشهد وبالنسبه للموظفه صارت ترفع بحواجبها وتضحك وحكتلي وانا كمان ما راح اشهد وبعدها رحت عالشيخ وحكيتله وانت كمان يا شيخ ما راح تشهد فحكالي الشيخ أجوه الله عليك ما اتدخلني بالموضوع فحكيتلهم شكرا على كل شي وطلعت فلحقني الشيخ وصار يترجاني ويحكيلي سامحه والعفو عند الوقدره.... والخ. انا كان اخر كلامي مع الشيخ انه يا شيخ اذا انطلبت للشهاده راح تبيع الاخره بالدنيا علشان مديرك فحكالي لو على موتي ما بشهد الا بالحق وسحبت حالي وطلعت هاي كل قصتي يا ابو هيثم.
اسم المدير موجود
اسم الموظف موجود
اسم الموظفه موجود
الشيخ موجود
وبالنسبه لأرقام تلفوناتي موجودة