الواسطة .. ابداع بتدمير الاحلام

اصعب شي بالحياة بني ادم يتعب وما يلاقي ثمرة التعب .. ولا حتى تقدير من الي حواليه .. هذا حالنا هون .. عشان شو؟؟ عشان ابن فلان وعلتان الي ما بيفهم شي بيدخل الجامعة وبيدرس احسن تخصص على حساب تعبنا وبيتخرج مقبول بعد الف واسطة وبيتوظف بأعلى المناصب كمان على حساب تعبنا .. يا اخي نحنا درسنا بهذا الوطن وتعبنا عشان نعطي هذا الوطن .. اعطونا مجال نطلع ابداعاتنا .. ليه هيك بتقتلوا طموحنا واحلامنا .. ليه بتخلوا الواحد يكبر قبل عمره الافتراضي من كثرت همومو .. انا عم بحكي من حرقة ومن وجع .. قال ليش الدكتور الفلاني عمل خطأ طبي وليش الدكتور العلاني بيشرح غلط وليش البناية بتقع على روس اصحابها وليش وليش وليش .. لانو كلهم ما بيستاهلوا المكان الي هم فيه .. شو الي وصلنا لهون ؟؟ شو الي خلى الاردن من البلدان الفقيرة غير انو فلان وعلتان ما بيعرفوا يشتغلوا منيح فبنضطر نستعين بناس وندفعلهم فلوس ... طيب وين راحت كفاءات البلد؟؟ طيب ليه ما نشغل الشخص الكفؤ .. والله غير يبدع وغير يزدهر الاردن .. ليه ما نكون عادلين مع غيرنا وانفسنا ؟؟ ليه بترضى تحطم حلم اخوي وما بترضى تحطم حلم ابنك او اخوك .. ما هو كمان اخوي بني ادم متل اخوك وابنك .. المشكلة انو بدنا ناس تحس .. هو صعب هالايام بس املي بالله كبير .. يمكن حتى صوتي ما يوصل وموضوعي ما يهم كتير او حتى ممكن ما حد يقرأه بس مو مشكلة بدي اكتب واصرخ واعلي بصوتي ... انا بدي حقي وحق كل مظلوم ..من لما كنت صغيرة كنا ناخد بكتاب الاجتماعيات انو الاردن بعاني من هجرة الكفاءات وكنت استغرب انا ... لحد ما فهمت هالجملة بس بشكل ثاني .. انتو الي بتطفشوا وبتزهقوا بالكفاءات .. انتو الي استغنيتوا عنهم وما مديتولهم ايدكم ... اضافة اعلان

... ليه اشوف اخوي قاعد صافن بحالو مش عارف شو يعمل .. الدنيا بتوخذو وبتوديه .. قصتي بلشت من لما اخوي الكبير دخل جامعة العلوم والتكنولوجيا الاردنية .. ااااااه الجامعة الي ما بيدرس فيها الا الشاطرين او اصحاب الواسطات .. مش موضوعنا .. المهم دخلنا بأمل كبير بعد اول تفوق لاخوي واستلامه شهادة تقدير من الجامعة بأول فصل اله فيها .. كنت اشوف الحياة بعيونه .. كل ما اطلع عليه احس انه في شي حلو ممكن يغير يومي لشي احلى واحلى .. اخوي دفعة 2006 وخريج 2010 كان الاول على تخصصه خلال فترة دراسته وكنا نضل نحكي هذا الشب رح يبدع والي زادنا ثقة كلام دكاترة التخصص اثناء مناقشة مشروع التخرج .. بالحرف الواحد حكوا عنه مبدع وبدنا اياه معنا بالجامعة .. التكنو وما التكنو وما ادراكم ما التكنو .. تخرج اخوي وقعد لحد ما طلبتو الجامعة سنة تكليف ... وضع مأساوي شي بيخزي .. راتب زهيد وما بيستلمه الا اخر كل فصل (يعني كل 3 اشهر مرة ) .. وما في تأمين ولا شي بساعده ويعطيه الامل ومع ذلك ضل عنا امل بربنا انه الجامعة تثبته وبعدين تبعثه .. اخوي حصل على اعلى معدل بالكلية خلال الاعوام كلها بتخصصه العلاج الوظيفي حصل على تقدير ممتاز بمعدل 89.7% .. طبعا لما تكلف ما كلفته الجامعة لوحده .. لا الجامعة كلفت معه الطالبة الثانية على الدفعة الي هي بتكون بنت اخو دكتور عندهم بالتخصص وهلا على ما اعتقد صار رئيس القسم .. ويمكن هلا صارت مثبتة ... اخوي شب وبدو يكون حاله والوضع هذا ما بيمشي لانه يا دوب بطلع ثمن اكله والمواصلات .. بس باسم انه بيشتغل بالجامعة ... وخلصت السنة وضلينا نستنا تطلبه الجامعة عالفصل الصيفي وما طلبته واستنينا للفصل الاول وكمان ما طلبته .. لشهر 10 اجى خالي من السعودية وهو بيشتغل بشركة صغيرة لبيع الاجهزة الطبية .. انحرق على اخوي وشفق عليه .. حكاله يا خالي انا بدي اخذك عندي .. واخذه عنده وهلا بيشتغل مندوب .. بس شايف الويلات .. هو مش مرتاح ولا احنا مرتاحين .. لحد الان بتابع اخبار الجامعة على امل من الجامعة ترأف بحاله ... بس لا حياة لمن تنادي .. هاي البنت الثانية عالدفعة ضلت شغالة بالجامعة بس اخوي ما شغلوه ليش ؟؟؟ .. اكثر من مرة رفع هو وزملاء اله شباب طلب للتثبيت خلال السنة الي قضاها بالجامعة وكان الرد سخيف كثير .. قال الجامعة ما عندها ميزانية ... طيب ضروري تنزلوا للموظف الفلاني سيارة بمبلغ كبير .. طيب مين اولى ؟؟؟
هذا شب وحالو حال كثير بالجامعة .. لو حد يفكر يعمل زيارة ويشوف او حتى يطلع على سنين خبرتهم دون تثبيت على امل يتثبتوا يمكن يحرك احساس المسؤولين مع انو بكل سنة في تثبيتات بس لناس وناس... والعمر بيمشي وهم واقفين .. ليش ما اتثبتوا براتب 350 دينار او 400 مش الف او الفين ... طيب مش حرام نعمل بأولادنا هيك مش حرام ندمرهم وندمر احلامهم !!!!!!
يا ريت الاقي للموضوع عندكم اهمية .. اخوي بيذبل قدام عيونا وهو مش قادر يأسس حاله ولا حتى يكمل دراسته مع انه كان عنده امل كبير انه يتثبت وينبعث لبرا ويرجع دكتور عالتكنو يفيد بلده واولاد هالبلد ..
علماً باني لم اذكر تفاصيل كثيرة رغبة مني ان اجد من شخص غيور على وطنه وابناء وطنه رسالة على بريدي الالكتروني رغبة في معرفة التفاصيل وتقديم المساعدة

ايات موسى فائق التاج
[email protected]