خليها على الله

بدي أحضر كميات مهولة من الفرح ..أحتاج لغرفة صغيرة ..صغيرة فقط ..لا يوجد بها شيء ..إلا مصاري من فئة الخمسين ...! خليها على الله ..المصاري مقدور عليهن ؛ بس الغرفة من وين نجيبها ..؟!اضافة اعلان


بدّي أمشي في الشارع أي شارع فيك يا أردن ..بدي أشوف الناس يسلمون على بعض و الابتسامة تملأ الوجه ..مش الواحد يقول لك : السلام عليكم و القنوة بين عينيه ..! خليها على الله ..الناس مقدور عليها ..بس الشارع من وين نلاقيه ..؟!

بدّي أفتح التلفزيون ..و أشوف حالي أو حال أي حدا أعرفه في أي مسلسل عربي ..كلها مسلسلات تتكلّم عن أشياء لا تحدث معي ولا مع الذين أعرفهم ..لماذا أنا خارج خارطة الواقعيّة ..ألستُ من الواقع ..؟ خليها على الله ...التلفزيون مقدور عليه ..بس أنا من وين يجيبوني ..؟

بدّي أصوم رمضان ..بدي أعطش و بدي أجوع ..وبدّي أتعبد..و بدي أعيش طقوس رمضان كلها ..بدّي وبدّي ..! خليها على الله ..رمضان مقدور عليه ..بس من وين بدنا نجيب جوع غير الجوع اللي قبل رمضان ..؟!

بدّي أحب الحكومة ..و أموت في دباديبها ..و أبعثلها رسائل بخط اليد ..ورسائل ع الايميل ..وع الفيس ..و إس إم أس ..بدي أعيش معها رومانسية على مدار الثانية ..! خليها على الله ..الحكومة مقدور عليها ..بس الحب من وين نجيبه ..؟!

خليها على الله ..نعم خليها ..كل عام وأنتم بخير ..