فلسفة شحدة

لدّاد: ممكن سيجارة ..و ولِّعها كمان ..!!
مرّاق طريق: ليش فيه بيني وبيك معرفة حتى تطلب سيجارة بولعتها ؟؟اضافة اعلان

لدّاد: لأ ما فيه ..بَس العَشَم خلاّني أطلب منك
مرّاق طريق: بس كمان العشم لازم يكون من واحد تعرفو
لدّاد: مزبوط ..بس العشم عند العرب معمّم ومش مُخصّص
مرّاق طريق: يا سلام ..بتعرف لو كل واحد عربي طلب منّي سيجارة باسم العشم ..أكيد رح أبطّل الدخان من أوّل يوم
لدّاد: هسّة شو بدّك بطول السيرة ..بدّك تعطيني سيجارة وإلاّ لأ ؟؟
مرّاق طريق: لأ
لدّاد: ممكن أعرف السبب؟؟
مرّاق طريق: عندي كمشة أسباب ..أولاً : ما بعرفك حتى أعطيك ..ثانياً ..مِش مرتاحلك ..ثالثاً : اسلوبك في طلب الشحدة زفت ..رابعاً .............
لدّاد( يقاطعه ) : خَلَص سطلت مخنا
مرّاق طريق: لسّة السبب الرئيسي ما حكيتو
لدّاد: وشو هو ؟؟
مرّاق طريق: أنا ما بدخِّن
لدّاد: ونازل تتفنطز عليّ من الصبح ..كان حكيت ما تدخن وريحتني
مرّاق طريق: ما أقدر أريحك أبداً ..لأنك أتعبتني لما طلبت السيجارة
لدّاد: أُخْ أُخْ ..إن شا الله بس ما صار معك جلطة ولا إشي
مرّاق طريق: مش لهدرجة ..بس ..بدّي إيّاك تعرف ..إنّو إحنا عرب
لدّاد: عارف إنو إحنا عرب
مرّاق طريق: قصدي إذا وصّلت فينا نشحد السيجارة ..إيش ظل ؟؟
لدّاد: ظل شغلة وحدة
مرّاق طريق: إيش هي ؟؟
لدّاد: نشحد بعد السيجارة سيجارة ثانية ..ها هاها هاها هاها