كلمة السّر

الطارش : بسْ إنتَ افتح الباب ..
لدّاد: ما بفتح ..لو تفتح في عينك قنّينة بيبسي
الطارش: طيّب ليش ..أنا شو عملتلك ..؟؟اضافة اعلان

لدّاد: ما عملتْ شي ..بس مش مطّمنلك..
الطارش: طيّب كيف ممكن تطمنلي..؟؟
لدّاد: احكي كلمة السر
الطارش: هاي بسيطة ..خَرْخَوُش مْخَرْخِشْ خوش
لدّاد: والله ..صحْ ..بس ليكون حدا محفظك إيّاها ..ترى صارت وبتصير
الطارش: افتح يا زلمة ..والله أنا المرسال
لدّاد(يفتح الباب ) : تفضل ..لا تواخذني ..ترى للضرورة أحكام
الطارش: إنت فهّمني ..ليش كل هالاجراءات ؟؟
لدّاد : من باب الاحتياط ..هو إنت تفكّر الشغلة إللي إنتَ جاي فيها هوينة ؟؟
الطارش: والله هوينة ..وأهون من هيك ما فيه ..كلمتين وردّ غطاهن ..!!
لدّاد: الكلمتين يجوز هوينات ..بس ردّ غطاهن ..هن الخازوق ..
الطارش: طيّب هات الخازوق ..قصدي هات الرد الغطا
لدّاد: مِشْ لمّا تجيب الكلمتين بالأوّل ..!!
الطارش: الكلمتين يا سيدي ..ودّاني عليك عمّك الكبير وبيسلّم عليك
لدّاد: الله يسلمك ويسلمه..
الطارش: آه ..وبعدين ..؟؟
لدّاد: ولا شي ..إنت حكيت الكلمتين ..وأنا أعطيتك رد غطاهن..!!
الطارش: بس أبو مفلح فهّمني غير هيك ..
لدّاد: شو فهمك ..؟؟
الطارش: قالي بتروح ..عَ لدّاد بتحكيله بيسلّم عليك عمّك الكبير..وهو رَح يفهم ويعطيك إللي بيني وبينه..
لدّاد: يعني إنت مُصِرّ يكون الرد خازوق ..؟؟
الطارش: بدّي الردّ النهائي ..
لدّاد: الردّ النهائي ..قوله بيسلّم عليك لدّاد ..وبيقولك ..فات الكثير وما ظل إلاّ القليل ..صبرت إللي راح فاصبر للي بدّو يجي ..وقوله كمان ..الدنيا ما طارت ..وهو أنا وين بدّي أروح ..أول ما يصير المبلغ معي عَلى طول أبعثلو إيّاه ..وكمان قولّه ..يطمّن عَ الآخر ..ويعتبر فلوسه أمانه معي ..وما رح يضيعن ..
الطارش: بس هو حكالي إنك وعدتو اليوم ..
لدّاد: أي هو أنا أوّل واحد يوعد ويخلف ..يعتبرني مسؤول ويتوكّل على الله ..أصلاً أنا من الأوّل ما كنت بدّي أفتحلك ..عارف شو بدك تحكي.